Waraysi Dr Sh Axmed Al- Qudubi qeybta( 3) aad

26/12/2006

Taariikh nololeedka Sheekha:
Taariikhda iyo meesha dhalashada
Tacliinta xalaqaatka
Tacliinta nidaamiga
Sh. Axmed: magaceyga waxaa layiraahdaa Axmed Sh. Xasan Sh. Axmed Qudubi waxaana ku dhashay gobalka Jubada hoose tuulo la yiraahdo Dhishigwamo oo u dhaw magalada Kismaayo taariikhdu Markey ahayd 1948.
Sagaal sano kadib ayaa naloo waday dhankaa iyo gobalka Soomaali galbeed ee Ithoobiya halkaas ayaan Qur`anka ku xifdiyay waxaa kale oo aan ku soo akhristay kutubta yar yar ee islaamiga ah sida Qaasimiga Ajruumiga iyo kuwa kale.
1968 ayaan ku soo laabtay magaalada Muqdisho ugu yaraan lixsano ayaan xerow ku ahaa Muqdisho waxaana akhristay kutubihii markaa la akhrin jiray waxaana kamid ahaa Minhaajka, waxaana akhristay Minhaajka afartiisa rubuc kan ugu yar waa rubuca looyaqaan jaraaxada`e afar jeer baan akhristay kuwa kalena wey kabadan yihiin inta aan akhristay, waxaana kamid ahaa culimadii aan ka akhristay, Allaha u naxariistee Sh. Abuukar Macalin iyo Sh. Xuseen cade iyo Sh. Yuusuf Direed iyo Sh. Maxamed Macalin Xasan iyo Sh. Maxamed Axmed Nuur(garyare) iyo kuwa kale.
Tafsiirka gaar ahaan waxaan ka dhegeystay Sh. Abuukar Macalin waxaana la akhrin jiray bisha Ramadaanka oo kaliya .
Iyadoo sidaas ay tahay baa wadanka waxaa dib ugu soo laabtay culima wax kusoo baratay jaamicaadka oo si casri ah u akhrinaya Tafsiirka waxana kamid ahaa culimadaa Sh. Maxamed Macalin, Sh. Maxamed Axmed Nuur (garyare), Sh. Ibrahim Suuley waxaan uga dhegeysan jiray Sh. Maxamed Macalin tafsiirka masjidka Sh.C/qadir ee ku yaalay Ceelgaabta magaladan Muqdisho.
Intaas kadib ayaan waxaan u leexday wax barashada cusub ee dhanka iskuulada waxaana galay wixi ladhihi jiray bicthatul Azhar waxaana ku qaatay dugsiga hoose markaas baa dowladii waxey soo rogtay wixii la dhihi jiray ololihii Af-Soomaaliga markaas baan isaga tegay wadanka oo aan u lugeeyay wadanka Suudaan, halkaas baan waxaan ka galay machad la yiraahdo {MACHAD UMU DURMAAN AL CILMI }waxaana kaqaatay shahaadada dugsiga sare waxaana galay { JAMACADDA UMU DURMAAN }kuliyadda luqada carabiga iyo aadaabteeda waxaana bilaabay jaamacadda sanad dugsiyeedkii 1976/1977 waxaana ka qalinjebiyay sanad dugsiyeed kii 1980/1981 kadibna waxaan qaatay dibloom tarbiya ah dabadeedna waxaan u safray yaman oo aan Macalin ka noqday muda 5 sano ah kadibna waxaan kulaabtay suudaan waxaana galay macahadka Jaamacada Carabta ee layiraahdo{MACHADUL KHARTUUM ADOWLI}waxaana ka qaatay shahaadada loo yaqaan mastaredka waxaana ku soo laabtay magaalada Muqdisho lix bilood burburkii Muqdisha ka hor oo aan meela dhowr ah ka akhriyay kutub kadibna waxaan ku laabtay dalka Suudaan waxaana ka soo qaatay shahaadada ugu sareysa shahaado la qaato oo looyaqaan (P.H.D) ama diktooraa takhasus ka ah{ALMANAAHIJ WADURUQ ATADRIIS} hadana jaamacada Muqdisho ayaan macalin ka ahay sidoo kale masaajidyo badan ayaan khadiib ka noqday kitaabana ka akhriyaa.

Dhamaad

Wabillahi towfiiq

Waxaa wareysiga ka qaaday
C/naasir Ganey & M .M Omar